பெண்களுக்கு மாரடைப்பு ஏற்படும்முன் என்னென்ன அறிகுறிகள் தோன்றும்

 

பெண்களின் மாரடைப்பு ஏற்படுவதற்கான வாய்ப்புகள் குறைவு என்று நீங்கள் எண்ணலாம். ஆனால் பெண்களின் மாதவிடாய் நிற்கும் காலங்களில் மாரடைப்பு ஏற்படுவதற்கான வாய்ப்புகள் அதிகமாக இருக்கிறது.

மாதவிடாய் நிற்கும் போது ஹார்மோன் மாற்றங்களால் இதய நோய்கள் ஏற்படும் அபாயம் உள்ளதால், பெண்கள் இருதய பிரச்சினைகளின் அறிகுறிகளையும், இருதய நோய் ஏற்படுவதற்கான ஆபத்து காரணிகளையும் தெரிந்து வைத்துக்கொள்வது வாழ்நாளில் ஆயுளை நீட்டிக்க உதவும். அமெரிக்காவில் அதிகமாக இருதய நோயால் பெண்கள் பாதிக்கப்படுகிறார்கள். இதனால் உயிரிழப்பு அதிகமாக உள்ளது. இது மார்பகம் அல்லது கருப்பை மற்றும் கருப்பை வாய்ப் புற்றுநோய்களில் இறப்பு விகிதத்தை விட அதிகமாக உள்ளது. 

​மாரடைப்பு எச்சரிக்கைகள் 

பெண்களுக்கு ஏற்படும் இதய பாதிப்புகள் குறித்த ஆய்வுகள், பல பெண்களுக்கு மாரடைப்பு நாட்கள் வாரங்கள் அல்லது மாதங்களில் கூட அறிகுறிகளை ஏற்படுத்தும் என்று கூறப்படுகிறது. சில அறிகுறிகள் பிரச்சனை இல்லை என்று பெண்கள் மற்றும் மருத்துவர்களால் நிராகரிக்கப்படலாம். இதனால் நோய் தீவிரம் அடைகிறது. நீங்கள் முன்னரே கண்டு தெரிந்து கொள்ள வேண்டிய மாரடைப்பு அறிகுறிகள் சில பற்றி தெரிந்து கொள்வோம். 

​சோர்வு 

பொதுவாக சோர்வு என்பது குறைவான தூக்கம், வைரஸ் தொற்று, அதிக வேலை அல்லது சில மருந்துகளின் பக்கவிளைவு காரணமாக ஏற்படலாம். ஆனால் நீங்கள் ஒரு அசாதாரணமான அல்லது தீவிர சோர்வு பிரச்சனையை தொடர்ந்து அனுபவித்து வருகிறீர்கள் என்றால், இது மாரடைப்புக்கான ஆரம்பகால அறிகுறியாகவோ அல்லது இதய நோய்க்கான எச்சரிக்கை அறிகுறியாகவும் இருக்கலாம். 70 சதவீதத்துக்கும் அதிகமான பெண்கள் மாரடைப்பு ஏற்படுவதற்கு வாரங்கள் அல்லது சில நாட்களுக்கு முன்னர் அதிக சோர்வினை அனுபவித்து வருகின்றனர் என்று ஆய்வில் தெரியவந்துள்ளது.

 தூக்கமின்மை

தூக்கமின்மை காரணமாக பெரும்பாலும் சோர்வு ஏற்படுவது வழக்கம் என்றாலும், உங்களுக்கு தொடர்ந்து தூங்குவதில் பிரச்சினை இருந்தால் அதை நீங்கள் கவனத்தில் எடுத்துக் கொள்ள வேண்டும். மாரடைப்பு பாதிக்கப்பட்ட பெண்களில் பாதிப்பேர் மாரடைப்பிற்கு சில நாட்கள் அல்லது சில வாரங்களுக்கு முன்னர் தூக்கப் பிரச்சனையை அனுபவித்ததாக ஆய்வில் கூறியுள்ளனர்.

​மூச்சுத் திணறல் 

நமது அன்றாட வாழ்க்கையின் நடவடிக்கைகளின்போது அஜீரணம் அல்லது பதற்றம் போன்றவற்றால் மூச்சுத் திணறல் ஏற்பட்டால், பெண்களில் அது மாரடைப்பு அறிகுறிகளாகவோ அல்லது இருதய நோயின் அறிகுறிகளாகவும் இருக்கலாம். 

இந்த அறிகுறிகள் தீவிரம் அடையும் நிலையை எப்படி கண்டுபிடிப்பது? உங்கள் அன்றாட பழக்கவழக்கங்கள் அல்லது உணவுகளில் ஏதேனும் உங்களுக்கு மாற்றம் தோன்றினால் அதனை ஒரு முக்கிய அறிகுறியாக எடுத்துக்கொள்ள வேண்டும். மேலும் உங்களுக்கு இதய நோய்க்கான ஆபத்து காரணிகள் இருப்பதை அறிந்தால் உங்களுக்கு எந்த மாதிரியான உணர்வு ஏற்படுகிறது என்பதை நீங்கள் கண்காணிக்க வேண்டும். 

ஆற்றல் குறைபாடு 

உங்கள் உடலில் ஆற்றல் குறைவு, தூக்கக் கலக்கத்தில் பிரச்சனை அல்லது அசாதாரண மாற்றங்கள் இருந்தால் உங்கள் மருத்துவரிடம் இதைக் குறித்து நீங்கள் ஆலோசனை பெறலாம். மேலும் உங்களுக்கு உயர் ரத்த அழுத்தம், அதிகக் கொழுப்பு, உடல் பருமன், நீரிழிவு, இதய நோய் ஆபத்து காரணிகள், புகைப்பழக்கம் போன்றவை ஏற்கனவே இருந்தால் நீங்கள் கவனமாக இருக்க வேண்டியது அவசியம். 

​பெண்களுக்கு ஏற்படும் அறிகுறிகள்

 பொதுவாக மாரடைப்பு ஏற்படும் போது ஆண், பெண் இருவருக்கும் மார்புவலி பொதுவான ஒரு அறிகுறியாக கருதப்படுகிறது. பெண்களின் மாரடைப்புக்கு முன்னர் உடலின் மற்ற பகுதிகளில் வலி அல்லது அசௌகரியம் ஏற்படுகிறது. முதுகு, கழுத்து, தோள்கள் மற்றும் கை தாடைகளில் மற்றும் தொண்டையில் கூட வலி ஏற்படுவது இதய பாதிப்பின் அறிகுறியாக இருக்கலாம். இந்த மாரடைப்பு காரணமாக கடுமையான சோர்வு, வயிற்று வலி, வியர்வை, தலைசுற்றல், அஜீரணம் மற்றும் குமட்டல் போன்ற பிரச்சினைகள் ஏற்படலாம். 

மாரடைப்பு ஏற்படுவதற்கு முன்னரே அதன் அறிகுறிகளை அறிந்து கொள்வது அவசர சிகிச்சை பெறுவதற்கு உதவும். ஒரு சில தருணங்களில் அறிகுறிகள் குறிப்பிட்ட காலத்திற்கு இருந்து, பின்னர் மீண்டும் வரக்கூடும் என்பதை நினைவில் வைத்துக் கொள்ளுங்கள். 

​மாரடைப்பு ஏற்படும் அபாயத்தை குறைக்க 

பெண்ணில் 40 வயதுக்கு பிறகு அல்லது மாதவிடாய் நிற்கும் காலங்களில் நமது உடலில் ஈஸ்ட்ரோஜன் உற்பத்தி குறைந்து கொழுப்பின் அளவை அதிகரிப்பதால் இதய நோய்கள் ஏற்படுவதற்கான ஆபத்து அதிகரிக்கிறது. ஹார்மோன் மாற்று சிகிச்சை ஆரம்பத்தில் பாதுகாப்பாக கருதப்பட்டாலும், இதயம் சார்ந்த பிரச்சனைகளை சரிசெய்ய உதவாது என்றும், இதயம், கருப்பை மற்றும் மார்பக புற்றுநோய் அபாயத்தை அதிகரிக்கும் எனவும் கண்டறியப்பட்டுள்ளது. 

​உயர் ரத்த அழுத்தம் 

நமது இதயத்தை பாதுகாக்கவும் மாரடைப்பு போன்ற பிரச்சனைகள் ஏற்படாமல் தடுக்கவும் நாம் என்ன செய்ய வேண்டும் என்று தெரிந்து கொள்வோம். அதிக அளவிலான கொழுப்பு ரத்த அழுத்தம் மற்றும் எடையை கட்டுப்படுத்துவதன் மூலம் மாரடைப்பு பிரச்சனைகளில் இருந்து தற்காத்துக் கொள்ளலாம். தொடர்ந்து உங்களது ரத்த அழுத்தத்தை சரிபார்க்கவும். ரத்த அழுத்தம் அதிகமாக இருந்தால் உங்களுக்கு பரிந்துரைக்கப்படும் மருந்துகளை எடுத்துக் கொள்ளலாம். 

​கடைபிடிக்க வேண்டியவை 

புகைப்பிடிக்கும் பழக்கம் உள்ளவராக இருந்தால் புகைப்பிடிக்கும் பழக்கத்தை நிறுத்துங்கள். 

நமது உடலுக்கு தேவையான கால்சியம், பொட்டாசியம் மற்றும் மெக்னீசியம் போன்ற ஊட்டச் சத்துகளைப் பெற காய்கறிகள் மற்றும் பழங்கள், முழு தானியங்கள், குறைந்த கொழுப்புள்ள பால் போன்றவற்றை எடுத்துக் கொள்ளுங்கள். 

நிறைவுற்ற கொழுப்பு உணவுகளுக்கு பதிலாக நிறைவுறா கொழுப்பு உணவுகளை தேர்ந்தெடுக்கலாம். 

வீடு மட்டும் வேலைகளில் ஏற்படும் மன அழுத்தத்தை குறைக்க சுவாசப் பயிற்சியை மேற்கொள்ளலாம். 

ஆல்கஹால் உட்கொள்ளுதலை கட்டுப்படுத்திக் கொள்ளுங்கள்.

 தினசரி குறைந்தது 30 நிமிடம் உடற்பயிற்சி மேற்கொள்ளுங்கள். 

உடல் எடை அதிகரிக்காமல் பார்த்துக் கொள்ளுங்கள். 

​புறக்கணிப்புகள் 

பெரும்பாலும் பெண்கள் அவர்களுக்கு ஏற்படும் நோயின் அறிகுறிகளை புறக்கணிக்கிறார்கள் என்று கூறப்படுகிறது. அதாவது இருதய பாதிப்பின் அறிகுறிகளுக்கு வேறு ஏதாவது காரணம் கூறி புறக்கணிக்கிறார்கள். தொடர்ந்து உங்களுக்கு அசாதாரண சோர்வு மற்றும் வலி, அசௌகரியம் போன்ற பிரச்சனைகள் இருந்தால் நீங்கள் அதை புறக்கணிக்கக் கூடாது. மாரடைப்பு ஏற்படுவதற்கு ஒரு மாதத்திற்கு முன்பே நமக்கு எச்சரிக்கை அறிகுறிகள் தென்பட கூடும் என்று ஆய்வு கூறுகிறது. இதை நீங்கள் சரியான நேரத்தில் கண்டறிந்தால் உங்கள் உயிரை காப்பாற்ற மருத்துவ உதவியை நாட முடியும்.

Share this post